馬場

馬季剛開鑼。早前有幸獲老闆邀請，到跑馬地馬場消遣。

他先離開公司，我完成工作再到會員席會合他。他離開前我問他，你是去傾生意、去睇定去賭。他表明要「賭」，但他不識賭，什麼Win, Q, T 都唔知，指我是最佳人選。我心想：「又是沒有OT的工作！」

帶筆、買報紙(僅除淨馬經)，出發。出發時想，總不會是我和老闆兩支公的，但老闆人緣好，我實在無法想到是誰作伴。

到了入口，等待還比我早出發的老闆，我心想他一定是先會女。一想就到，兼就中。除了另一個「老死」外，還有一個打扮仿高貴的女子，黑色長裙，高跟鞋，大大的LV袋。不過，沒有穿絲襪下，瘦瘦的身段，一雙腿就像鳳瓜一樣。面部長年受有大量化工品的化妝品蠶食下，就像一片腐皮。她們都不明白，無論用多貴的化妝品，最後都只得一個下場，就是越化越衰。算吧，還是想想今晚如何問馬會拿OT好了。

中菜部，十台人九台賭，根公眾席沒有大分別，只是食品不是麥當勞，而且有人幫你落飛咁解。當然，會員除了賭馬外，亦有傾生意、會友等的工作要做。

一台四人，老闆先點菜，然後開始與一眾馬迷的賭局。大家都明白，馬會於賽馬上只食水，不對賭，唯一就是要同政府對賭，賭包底博彩稅。

老闆無方向，無水心，但有銀兩。我與「老死」坐在一邊，兩人一份「東方」，一份「節節領先」，邊睇晨操邊睇倍率，老闆不知是什麼，只拿馬會的馬簿，簿內什麼都沒有。

靚女問：「乜你o地唔知馬會有o野俾你睇o家，帶份報紙咁攪笑，成個阿伯咁。」

老死一有成人身份證已跟老豆入場，再做埋會員，係馬場常客，經驗老到。他回應：「乜你唔知無賠率、無晨操料睇o家?」

頭兩場，老闆都是偷看我們的料，中了一些位置。該靚女開頭只說：「賽馬，咪就係賭，我先唔覺得有乜特別，係咁賭，cheap到死。」老闆當然不作聽，因為慶功或發洩，今晚都要有靚女，何況入場時老闆跟我說她是嚷著要來的。

我解圍：「那便看好了，看那馬怎樣贏出來，就像看賽跑一樣，你看露台上那位老會員，一直沒有落注，只在拿望遠鏡看，看足三場。」英國的沒有香港的賭得狂，視之為運動，但他們也一樣賭。英國人是其中將運動和賭博連成一體的專家，William Hill 和 Ladbrokes開波盤開得五花百門，開盤的娛樂性比馬會高得多。Betfair 還來了個交易所。

不知步速、路程、騎法、檔位謂何物的她，當然無法享受，亦不明白不賭亦有不賭的樂趣。當年百勝威大戰多威的情景，十元連贏也不落注，但最後直路的緊張及刺激性也很高。

姣婆點守寡，見我o地贏錢，佢第四場就同老闆講：「我又想試O下玩！」老闆直指我：「你問佢今場點睇。」

「權勇駿囉，位置買有15蚊，頭牌華人騎有磅減。」我答。

「位置即係點。」靚女。老闆搶答：「即係頭三甲。」

「12隻馬三甲，1/4機會，佢得50% Profit，一定好勁啦，我都識揀啦。」靚女串我。

「睇埋隻京城孖寶，磅輕檔好，位置買兩個開，十蚊賠廿蚊。」我無串佢，再俾多隻。

「是但啦，都唔知中唔中的。」靚女答。

老死話：「不如你揀隻中的俾我，低能。」老闆望望老死，老死俾個朋友面，放手唔再追殺。

「我唔識買，不如你買啦!每人$500.00，我旺呀，你實贏o者。我唔洗俾錢你啦，你之後中o左分返俾我咪得囉」她對著老闆說。

老闆最後揀了京城孖寶，跑贏實收二千五十，減了本後馬上笑對靚女說：「你真旺!!」然後張五百放在台上。

「o依??一人一半，乜唔係一千咩。乜得五百呀??」靚女大聲向老闆問：「你抽我水!!」

老死答：「你都無俾個本，佢抽你水都跑完晒先啦。」然後他就走到朋友旁吹吹水。

老死回來，帶同重要的訊息，細聲跟我說：「頭先吹水收到料話7場2有機，不過好冷。唔係實料呀，我成日聽話係料，都係流o野。」兩人先暗地各買50位置。

我亦識做地在第7場sms俾老闆，讓老闆有機會威威。佢收到sms後就同靚女講：「睇o下你係唔係咁旺?不如我o地揀隻冷o的的馬，買位置，你咁旺，佢實跑出來。」已識少少買馬的老闆，已經走到投注窗口落飛，點買我唔知，但最後實收皮幾。

「我都話我旺啦！我咁叻，係我功勞呀！」靚女不停嚷著，像是老闆欠了她的一樣。
老闆明白意思，橫掂馬會錢，分了一皮俾佢。

最後4人落到出口，佢就話送靚女回家。我還好，有一點OT錢落袋。